குப்பைகளின் அன்பு
# ராணிதிலக்
எனக்கு அன்பு காட்டத் தெரியவில்லை
மதிய வேளையில்
யாருமற்ற சாலையின் மையத்தில்
சுட்டெரிக்கும்
வெயிலில்
வெப்பக் காற்றில் அலைந்தபடி
நிழல்தேடித் திரிகிறது
கசங்கிய ஒரு காகிதக் குப்பை
நான் அதைக் குனிந்து எடுத்து
சாலையோரத்தில் வாழும்
அதன்
வட்டவடிவ வீட்டில் சேர்த்தேன்
எல்லாக் குப்பைகளின்
முகத்திலும் ஒரே சந்தோஷம்
அவை
அதைக் கட்டி அணைத்துக்கொள்கின்றன
எனக்கு அன்பு காட்ட யாரும் இல்லை.
