காரைக்குடி சாதிக்

நடுநிசியில்

அயர்ந்து உறங்கும் பயணியைத்
தட்டி எழுப்பி
காபி குடிக்க அழைக்கிறான்
இரவு வியாபாரி.

தூக்கக்கலக்கத்தில் இறங்கி
சிறுநீரை ஐந்து ரூபாய்க்குக்
கழித்து ஏதும் வாங்காமல்
பேருந்து மாறி உறங்கி
இறுதி நிறுத்தத்தில்
உடைமைகளைத் தேடி
டிக்கெட் இல்லாப் பயணத்திற்கு
அபராதம் கட்டியவனை
கேலி பேசிச் சிரிக்கிறது
இழந்த பேருந்தின் டிக்கெட்.

சரியான நேரத்தில்
சரியான பேருந்தில்
சரியான சில்லறை கொடுத்தும்
ஊர் சேராத பயணங்கள்
பேருந்துநிலையத்தில்
எப்போதும் அலைகின்றன.

எத்தனையோ பேருந்து
வந்து போக
அவனுக்கான பேருந்து
இன்னும் வரவில்லை.

- காரைக்குடி சாதிக்