சௌவி

இருளத் தொடங்கிவிட்ட நேரத்தில்
மின்னல் மின்னுகிறது

மழை வரும்போலிருக்கே என
கொடியில் காய்ந்து கொண்டிருந்த
துணிகளை எடுக்கிறார் அம்மா

நிறுத்தி வைத்திருக்கும்
இருசக்கர வாகனத்தைப்
போர்த்தி வைக்கிறான் தம்பி

மாட்டைப்பிடித்து
சாலைக்குள் கட்டுகிறார் அப்பா

திண்ணை மேலேறிப் படுக்கச்சொல்லி
நாய்க்கு சாக்கு விரிக்கிறாள்
தங்கை

பட்டியாடுகள் நனைந்துவிடும்
கொட்டிலுக்குள் மூடவேண்டுமென
நேரத்திலேயே புறப்பட்டார்
சித்தப்பா

வீட்டுக்குள் மழையொழுகும் இடங்களில்
முன்கூட்டியே
சட்டிகளை எடுத்து வைத்தாள்
பாட்டி

வீடுகட்ட
மணல் வாங்கிக் குவித்திருந்த
பக்கத்து வீட்டுக்காரர்
தார்ப்பாயை
வாடகைக்கு வாங்கி வந்து
மூடினார்

மழை வரவேயில்லை

ஆனால் எல்லோருக்குள்ளும்
ஒரு மழை
பெய்துவிட்டுப்போயிருந்தது

-சௌவி