மனுஷ்ய புத்திரன்

நான் உன்னை இன்று

பார்க்க வரலாம் என்றிருந்தேன்

மழை வந்துவிட்டது

அதனால் வரவில்லை

இன்று ஒரு பயணத்தை

திட்டமிட்டிருந்தேன்

மழை வந்துவிட்டது

அதனால் பயணத்தை

ரத்து செய்து விட்டேன்

இன்று ஒரு முக்கியமான

வேலை இருந்தது

மழை வந்துவிட்டது

அதனால் அந்த வேலையை

நிறுத்தி விட்டேன்

இன்று ஒரு ஒப்பந்தத்தில்

கட்டாயமாக கையெழுத்திட வேண்டியிருந்தது

மழை வந்து விட்டது

அதனால் அது நடக்கவில்லை

இன்று சில முக்கியமான பொருள்களை

வாங்கப் போகலாம் என்றிருந்தேன்

மழை வந்து விட்டது

அதனால் ஒன்றையும் வாங்கவில்லை

நலமற்றிருந்த ஒருவரைக் காண வேண்டியிருந்தது

ஒரு திருமணத்திற்குப் போக வேண்டியிருந்தது

ஒரு துக்கம் கேட்க வேண்டியிருந்தது

ஒரு பிறந்த நாள் பூங்கொத்து வாங்க வேண்டியிருந்தது

மழை வந்து விட்டது

எங்கும் போக முடியவில்லை

மழை எல்லாவற்றிற்கும்

ஒரு சமாதானத்தைத் தருகிறது

எல்லா குற்றவுணர்விலிருந்தும் விடுவிக்கிறது

வாழ்வோடு இருக்கும்

மிகப் பெரிய சமரச ஏற்பாடே

இந்த மழைதான் என்று தோன்றும்படி

எல்லாவற்றிற்கும் பதிலியாய்

மழை பெய்து கொண்டேயிருக்கிறது

இந்த மழை மட்டும் இப்படியே 

பெய்து கொண்டிருந்தால் 

எல்லா பொறுப்புகளிலிருந்தும்

விடுபட்டு விடுவேன்

16.11.2020

மாலை 6.13

மனுஷ்ய புத்திரன்